Այսօր Էռնեստո Վալվերդեն մասնակցել է Կատալոնիայի դերբիին նվիրված նախախաղային մամլո ասուլիսին: Ներկայացնում ենք առավել հետաքրքիր հատվածները:
"Տրանսֆերային պատուհանի լավն այն է, որ այն վերջացել է և մենք կարող ենք կենտրոնանալ այն թիմի վրա, որն ունենք: Իսկ այն լավագույնն է, այն մերն է և պետք չէ թերագնահատել մեր ունեցածը":
"Խաղադաշտից դուրս հարցերը պետք չէ քննարկել: Ինիեստան ակումբի հարստությունն է: Նա իրեն լավ է զգում, գոհ է և մտադիր է շատ բան տալ թիմին: Ես ոչ մի կասկած չունեմ, որ նրանք ի վերջո համաձայնության կգան":
"Դեմբելեի վրա այս օրերի մարզումները շատ դրական են ազդել, օրեցօր նա ավելի ազատ և անկաշկանդ է դառնում, նա պատրաստ է խաղին: Կտեսնենք, թե որքանով կօգտագործենք նրան":
"Ոչ մի բացատրություն չունեմ հավաքականների խաղերից հետո արձանագրվող անհաջողություններին: Սուարեզն ու Պաուլինյոն այսօր մարզվել են, բայց դեռ պետք է տեսնենք, թե ինչ վիճակում կլինեն նրանք":
"Եթե նույնիսկ ես արդեն որոշել եմ, որ Դեմբելեն լինելու է մեկնարկային կազմում, չեմ պատրաստվում հայտնել դա մրցակցին: Ես էլ չգիտեմ Էսպանյոլի կազմը":
"Սուարեզը հավաքականի կազմում 2 շատ ծանր հանդիպումներ է անցկացրել: Պետք է գնահատել իրավիճակը, քանի որ երեքշաբթի մենք խաղում ենք Չեմպիոնների լիգայում":
"Սպասում եմ ագրեսիվ գործող Էսպանյոլի, որը մեծ ճնշում կգործադրի: Տեսնենք՝ ինչ կլինի":
"Քանի որ սա Բարսան է, երբեմն աղմուկն ավելի շատ է, քան իրականում այն կա":
"Հասկանում եմ, որ մեր նոր ձեռքբերումներից մեծ են սպասելիքները, բայց դա դեռ ոչինչ չի նշանակում: Պետք է լավ խաղալ ու հաղթել, որպեսզի այդ ձեռքբերումներն արդարացված համարվեն":
"Ամեն օր Դեմբելեն ինձ ավելի ու ավելի է գոհացնում, նա ընդամենը 20 տարեկան է, այնպես չէ, որ նա վատ մարզավիճակում է, պարզապես օրեցօր ավելի է հարմարվում խաղընկերներին":
"Յուվե՞ն: Այդ հարցը կտաք 2 օր հետո":
"Մեզ և շատերի համար Մեսսին լավագույնն է աշխարհում: Կտան նրան Ոսկե գնդակ, թե՝ ոչ, դա արդեն որևէ նշանակություն չունի":
"Ես Բարսայի մարզիչն եմ և կենտրոնանում եմ մարզական մասի վրա: Ակումբին երկրպագում են միլիոնավոր մարդիկ և յուրաքանչյուրն ունի իր գաղափարները: Ես այստեղ չեմ իմ կարծիքը նման հարցերում ասելու համար":
"Բենեդիտո՞ն: Իհարկե, մենք գիտենք այդ ամենի մասին, բայց գիտենք նաև այս ակումբում մեր դերի մասին՝ խփել շատ գոլեր և հնարավորինս քիչ բաց թողնել: Ակումբը պատկանում է ակումբի անդամներին և կա հստակ կանոնակարգ, որը պետք է պահպանվի: Նրանք են որոշում, թե ինչ է պետք ակումբին":
"Մրցավարների աշխատանքն առանց այդ էլ բարդ է և պետք է նրանց օգնել, որպեսզի հնարավորինս քիչ սխալվեն: Նրանք, ինչպես և մենք բոլորս, կարող են սխալվել":
