Նեյմարի սերիալը կարծես վերջ չունի: Ավելին, նոր խաղացող է հայտնվել, որն ավելի լուրջ ու ազդեցիկ է, քան նույնիսկ 2 ակումբները: Խոսքն Իսպանիայի պրոֆեսիոնալ ֆուտբոլային լիգայի (LFP) մասին է:
Բանն այն է, որ ֆուտբոլիստների ու ակումբների միջև կնքվող պայմանագրերի կատարման վերահսկողությունն իրականացնում է LFP - ն: Այդ պատճառով, եթե խաղացողը ցանկանում է միակողմանի խզել պայմանագիրը, վճարելով հրաժարագինը, պետք է այդ վճարումը կատարի LFP - ին, ինչից հետո կառույցն այդ մասին տեղեկացնում է ակումբին և անմիջապես փոխանցում գումարը:
Եվ ահա, ինչպես հաղորդում է իսպանական Sport - ը, եթե նույնիսկ ՊՍԺ - ն վճարի Նեյմարի հրաժարագինը, LFP - ն այդ վճարումը չի ընդունի: Իսպանիայի պրոֆեսիոնալ ֆուտբոլային լիգան պահանջում է, որպեսզի վճարող կողմը ներկայացնի անհրաժեշտ փաստաթղթերը, որով կապացուցի, որ այդ գործարքով չի խախտվում ոչ մի օրենք, ո՛չ ֆինանսական fair play - ի, ո՛չ գործող որևէ այլ օրենք: Այդպիսով, LFP - ն արգելափակում է Նեյմարի տրանսֆերը:
"Չնայած ՊՍԺ - ն դեռ չի վճարել հրաժարագինը, մենք հայտարարում ենք այս մասին: Մենք արդեն զգուշացրել ենք ՊՍԺ - ի նախագահին մեր մտադրությունների մասին, բայց տեսնում ենք, որ նրանց քաղաքականությունը չի փոխվում: Նրանք չեն կարող առանց օրենքը խախտելու վճարել ավելին, քան Ռեալ Մադրիդը կամ Բարսելոնան: Դրան ոչ ոք չի հավատում", - հայտարարել է LFP - ի նախագահ Խավիեր Տեբասը: