Բարսելոնայի նախագահ Խոսեպ Մարիա Բարտոմեուն այսօր մամլո ասուլիս է հրավիրել, որի գլխավոր նպատակը թիմի նոր գլխավոր մարզչի անունը հրապարակելն էր:
Ինչպես արդեն հայտնել ենք, Էնրիկեին փոխարինելու է Վալվերդեն: Բարտոմեուն հայտարարել է. "Բարսայի նոր գլխավոր մարզիչը լինելու է Էրնեստո Վալվերդեն: Պատճառները շատ են: Նա թիմ կգա իր օգնականներ Ջոն Ասպիասուի և Խոսե Անտոնիո Պոսանկոյի հետ":
"Այսօր խոսել եմ Վալվերդեի հետ և նա շատ երջանիկ է, սա նրա համար յուրահատուկ մարտահրավեր է: Նա ունի անհրաժեշտ բոլոր կարողությունները, գիտելիքներն ու փորձը, նրա աշխատելաոճը համապատասխանում է մեր ակումբին, նա սիրում է հիմնվել մարզադպրոցի վրա, նա մեծ ծավալի աշխատանք է կատարում, կիրառելով նորագույն տեխնոլոգիաներ մարզումների և խաղերի ընթացքում", - ավելացրել է Բարսելոնայի նախագահը:
Նա նաև հայտնել է, թե երբ Վալվերդեն պաշտոնապես կներկայացվի որպես թիմի գլխավոր մարզիչ. "Վալվերդեն կներկայացվի հինգշաբթի օրը: Ռոբերտն արդեն պլանավորել է առաջիկա մրցաշրջանը, հինգշաբթի կլինի հարց ու պատասխան, նրանք կպատասխանեն ձեր հարցերին": "Էրնեստոն շատ գոհ է և հուզված: Նա պայմանագիրը կկնքի 2 + 1 բանաձևով (2 - ամյա պայմանագիր՝ ևս 1 տարով երկարաձգելու հնարավորությամբ)", - նշել է Բարտոմեուն:
