Այսօր կարող է պաշտոնապես հայտարարվել ֆրանսիական Թուլուզի պաշտպան Ժան - Կլեր Տոդիբոյի՝ Բարսելոնա տեղափոխության մասին:
Ինչպես հաղորդում է կատալոնական Sport - ը, Բարսելոնան հույս ունի համաձայնության գալ Թուլուզի հետ, չնայած, որ ֆուտբոլիստի պայմանագիրն ավարտվում է ամռանը:
Բանն այն է, որ Տոդիբոն հրաժարվել է երկարաձգել պայմանագիրը ֆրանսիական ակումբի հետ, ինչպես նաև մերժել է Մանչեսթեր Սիթիի ու Յուվենտուսի առաջարկները: Դա հանգեցրել է բավական լարված հարաբերությունների խաղացողի և Թուլուզի ղեկավարության միջև:
Բարսելոնայում պատրաստ են որոշակի գումար վճարել Տոդիբոյի տրանսֆերի դիմաց, որպեսզի թուլացնեն լարվածությունը, որի հետևանքով ֆուտբոլիստը կարող է մրցաշրջանի մնացած հատվածում մնալ առանց խաղային պրակտիկայի:
Ամեն դեպքում, կատալոնական ակումբը նախատեսում է տեղափոխությունն իրականացնել ամռանը, և եթե նույնիսկ գնի Տոդիբոյի տրանսֆերը ձմռանը, ապա նրան վարձավճարով կտրամադրի Լա Լիգայում հանդես եկող ակումբներից որևէ մեկին կամ հենց նույն Թուլուզին:
Նշենք, որ Տոդիբոյի տրանսֆերն անձամբ Բարսելոնայի մարզական տնօրեն Էրիկ Աբիդալի նախաձեռնությունն է: Նա 19 տարեկան է, խաղում է պաշտապության կենտրոնում և առաջին թիմում հանդես է գալիս 2018 թվականից:
