Բարսելոնան, ինչպես և սպասվում էր, ձեռնարկել է անհրաժեշտ քայլերը պաշտպանության կենտրոնն ուժեղացնելու համար: Կատալոնական ակումբը նոր ձեռքբերում ունի:
Բարսելոնան և Վալենսիան համաձայնության են հասել Ջեյսոն Մուրիլյոյի տրանսֆերի վարձակալության շուրջ, հաղորդում է կատալոնական ակումբի պաշտոնական կայքը: Նա Վալվերդեի թիմում հանդես կգա առնվազն մինչև ընթացիկ մրցաշրջանի ավարտը:
Պաշտոնական հաղորդագրության մեջ գործարքի մանրամասները չեն նշվում, սակայն, համաձայն կատալոնական լրատվամիջոցների, Բարսան Մուրիլյոյի վարձակալության համար Վալենսիային է վճարել 2 մլն եվրո: Կապտանռնագույնները նաև իրավունք են ստացել ցանկության դեպքում գնել կոլումբիացի կենտրոնական պաշտպանի ամբողջական տրանսֆերը մինչև ամառային տրանսֆերային պատուհանի ավարտը: Համաձայն լրատվամիջոցների, այդ ենթադրյալ գործարքը կարժենա 25 մլն եվրո:
Հիշեցնենք, որ Սամուել Ումտիտին երկար ժամանակ բացակայում է ծնկի վնասվածքի պատճառով և մեծ է հավանականությունը, որ կվիրահատվի ու բաց կթողնի մրցաշրջանի մնացած հատվածը: Թոմաս Վերմալենն էլ պարբերաբար վնասվածքներ է ստանում: Մուրիլյոն 26 տարեկան է, հանդես է եկել Գրանադայում, Վալենսիայում, իսպանական մի շարք այլ ակումբներում, ինչպես նաև Միլանի Ինտերում: Եվ այժմ նա պետք է օգնի Վալվերդեին լրացնել բացը պաշտպանության կենտրոնում:
